KOSOVË- Kuvendi i Kosovës nuk arriti të konstituohet brenda afatit 30-ditor të përcaktuar nga Gjykata Kushtetuese, ndërsa seanca konstituive do të vijojë sot në orën 11:00.

Kryesuesi i Kuvendit, Avni Dehari, vendosi shtyrjen e seancës të enjten, pas kërkesës së kryeministrit në detyrë, Albin Kurti, për më shumë kohë për zhvillimin e bisedimeve politike me partitë e tjera, me synim arritjen e një marrëveshjeje për formimin e institucioneve të reja.

Afati kushtetues për konstituimin e Kuvendit përfundoi në mesnatën e së premtes, ndërsa vendimi për vijimin e seancës të shtunën është kundërshtuar nga partitë opozitare dhe përfaqësues të shoqërisë civile.

Seanca pritet të rifillojë aty ku u ndërpre, me procedurën për zgjedhjen e kryetarit dhe pesë nënkryetarëve të Kuvendit. Megjithatë, mbetet për t’u parë nëse opozita do të marrë pjesë në proces.

Opozita: Shkelje e rendit kushtetues

Vendimi për shtyrjen e seancës është kundërshtuar nga tri partitë kryesore opozitare, PDK, LDK dhe Aleanca. Ato e kanë akuzuar partinë në pushtet për shpërfillje të aktgjykimit të Gjykatës Kushtetuese dhe kanë kërkuar që seanca të vijonte para përfundimit të afatit.

Disa deputetë opozitarë qëndruan në ambientet e Kuvendit deri në mesnatë, në shenjë kundërshtimi ndaj vendimit.

Eksperti i Institutit Demokratik të Kosovës, Eugen Cakolli, e konsideroi vendimin për caktimin e seancës pas përfundimit të afatit si shkelje të drejtpërdrejtë të rendit kushtetues.

Sipas tij, kryesuesi i Kuvendit duhej të thërriste vazhdimin e seancës në një orar që do të mundësonte përfundimin e procedurave brenda orës 23:59.

Ndërkohë, Naim Jakaj nga Instituti i Kosovës për Drejtësi vlerëson se mosrespektimi i afatit përbën shkelje kushtetuese, por kjo nuk do të thotë se seanca nuk mund të zhvillohet pas përfundimit të afatit.

Sipas tij, mungesa e një sanksioni të përcaktuar qartë për këtë situatë krijon një hapësirë procedurale që lejon vazhdimin e procesit edhe pas skadimit të afatit.

Kurti dhe Abdixhiku dështojnë sërish për marrëveshjen

Kriza institucionale lidhet drejtpërdrejt me mungesën e një marrëveshjeje politike për formimin e institucioneve të reja.

Pak orë para skadimit të afatit, kryeministri në detyrë Albin Kurti dhe kryetari i Lidhjes Demokratike të Kosovës, Lumir Abdixhiku, zhvilluan një tjetër takim, por pa arritur një marrëveshje.

Pika kryesore e mosmarrëveshjes mbetet posti i presidentit.

LDK-ja, e cila siguroi 18 mandate në zgjedhjet e fundit, kërkon të ketë të drejtën për të propozuar kandidatin për president. Abdixhiku ka deklaruar se partia e tij nuk sheh mundësi për vazhdimin e negociatave nëse kjo kërkesë nuk pranohet.

Nga ana tjetër, Kurti, partia e të cilit mori 53 mandate, ka kundërshtuar një marrëveshje që, sipas tij, do të deformonte rezultatin e zgjedhjeve dhe vullnetin e votuesve.

Oferta e LVV-së për LDK-në përfshin postin e zëvendëskryeministrit, disa ministri dhe drejtimin e Kuvendit, por Abdixhiku e ka konsideruar këtë paketë të pamjaftueshme pa marrëveshje për postin e presidentit.

Kurti i drejtohet edhe PDK-së

Në përpjekjen për të shmangur një tjetër bllokim institucional, Kurti i dërgoi një letër kryetarit të PDK-së, Bedri Hamza, duke i ofruar partisë së tij postin e kryetarit të Kuvendit.

Në këmbim, Kurti kërkoi që 22 deputetët e PDK-së të jenë të pranishëm në sallë gjatë votimit për presidentin.

PDK-ja dhe Aleanca kanë deklaruar se nuk duan të hyjnë në bashkëqeverisje me Kurtin dhe synojnë të qëndrojnë në opozitë.

Kjo e bën edhe më të vështirë zgjidhjen e ngërçit, pasi LVV-ja i ka votat e nevojshme për konstituimin e Kuvendit dhe formimin e Qeverisë, por nuk i ka të mjaftueshme për zgjedhjen e presidentit.

Rreziku i zgjedhjeve të reja

Nëse nuk arrihet një marrëveshje politike, Kosova rrezikon të shkojë sërish në zgjedhje të parakohshme parlamentare.

Për zgjedhjen e presidentit kërkohet prania e të paktën 80 deputetëve në sallë. Në rast se presidenti i ri nuk zgjidhet brenda dy muajve të ardhshëm, vendi do të përballet me një tjetër krizë institucionale dhe me mundësinë e shpërndarjes së Kuvendit.

Kjo do të sillte një tjetër palë zgjedhjesh parlamentare, të cilat do të ishin të katërtat brenda dy viteve të fundit.

Ndërkohë, vëmendja është përqendruar te seanca e sotme e Kuvendit, e cila pritet të nisë në orën 11:00. Ajo do të tregojë nëse partitë do të rikthehen në procesin e konstituimit apo nëse ngërçi politik do të thellohet edhe më tej.