UKRAINË- Tre persona, mes tyre një fëmijë, kanë humbur jetën në një seri sulmesh ruse me raketa gjatë natës pranë kryeqytetit ukrainas, Kiev.

Sulmet ndodhën në orët e para të së shtunës, ndërsa raketat goditën zona në lindje të kryeqytetit. Banorët raportuan shpërthime të fuqishme, ndërsa autoritetet ukrainase konfirmuan viktimat dhe dëmet materiale.

Sipas kreut të administratës ushtarake të rajonit, Timur Tkachenko, tre persona të tjerë kanë mbetur të plagosur si pasojë e sulmeve me raketa balistike.

Mbetjet e raketave të rrëzuara kanë dëmtuar ndërtesa banimi dhe automjete, ndërsa janë regjistruar edhe zjarre në disa objekte. Kryebashkiaku i Kievit, Vitaly Klitschko, bëri të ditur se ekipet e emergjencës po punonin për shuarjen e flakëve në një ndërtesë dhe në një depo karburanti.

Shërbimi Shtetëror i Emergjencave të Ukrainës (DSNS) publikoi pamje nga zona e goditur, ku shihen garazhe, një biznes dhe një ndërtesë të përfshira nga flakët.

Autoritetet vijojnë operacionet në terren, ndërsa numri përfundimtar i viktimave dhe personave të prekur nga sulmet mbetet ende për t’u përcaktuar.

Sulmet pranë Kievit vijnë vetëm pak ditë pas një vale sulmesh ruse në zona të ndryshme të Ukrainës, ku humbën jetën 21 persona.

Ndërkohë, presidenti ukrainas Volodymyr Zelensky ka mbërritur në Serbi për vizitën e tij të parë në këtë vend. Vizita zhvillohet në një periudhë kur presidenti ukrainas ka shprehur shqetësime për kapacitetet mbrojtëse të Ukrainës ndaj sulmeve ruse me raketa, për shkak të pakësimit të rezervave të raketave interceptuese.