MORINË- Fluks i lartë automjetesh është regjistruar këtë të shtunë në pikën kufitare të Morinës, ndërsa qindra pushues nga Kosova po udhëtojnë drejt Shqipërisë për të kaluar ditët e pushimeve në bregdet.

Ngarkesa e automjeteve është e dukshme përgjatë Rrugës së Kombit, veçanërisht në segmentin mes pikës kufitare të Morinës dhe pikës së pagesës, ku qarkullimi është shtuar ndjeshëm.

Për të menaxhuar fluksin e udhëtarëve dhe për të shmangur krijimin e radhëve të gjata, në pikën kufitare po operojnë të gjitha sportelet në dispozicion.

Masa për lehtësimin e qarkullimit janë marrë edhe në pikën e pagesës së Rrugës së Kombit, me synim përshpejtimin e kalimit të automjeteve dhe reduktimin e vonesave.

Autoritetet parashikojnë që fluksi i lartë të vijojë gjatë gjithë fundjavës, në kushtet kur mijëra qytetarë nga Kosova kanë zgjedhur Shqipërinë si destinacion për pushimet verore.

Pika kufitare e Morinës mbetet një nga akset kryesore të hyrjes së turistëve nga Kosova drejt Shqipërisë, veçanërisht gjatë muajve të sezonit të verës.