RROGOZHINË, 7 gusht – Banorë të Rrogozhinës kanë zhvilluar një protestë kundër propozimeve për riorganizimin territorial që parashikojnë bashkimin e kësaj bashkie me Kavajën.

Protestuesit u mblodhën në Parkun e Qytetit nën sloganin “Rrogozhina është e jona”, duke kërkuar që qyteti të ruajë statusin e tij administrativ dhe të mos përfshihet në një bashkim të ri territorial.

Banorët argumentuan se një bashkim me Bashkinë e Kavajës nuk do të sillte zgjidhje për problemet lokale, pasi sipas tyre edhe kjo bashki përballet me sfidat e veta dhe nuk mund të përballojë problematikat e një territori tjetër.

Ata i kanë bërë thirrje autoriteteve që të marrin në konsideratë shqetësimet e komunitetit përpara marrjes së një vendimi përfundimtar.

Protestuesit paralajmëruan se, nëse kërkesat e tyre nuk do të merren parasysh, do të vijojnë me forma të tjera reagimi kundër reformës së propozuar territoriale.