CEUTA, 7 gusht – Një migrant me origjinë afrikane ka humbur jetën gjatë një përpjekjeje për të hyrë në enklavën spanjolle të Ceutës nga territori i Marokut, duke përdorur një parashutë.

Sipas autoriteteve spanjolle, ngjarja ndodhi të premten rreth orës 08:00, kur personi ra në det gjatë tentativës për të kaluar kufirin. Ekipet e shpëtimit e gjetën pa ndjenja dhe tentuan ta rikthenin në jetë, por ndërhyrja rezultoi e pasuksesshme.

Ky është rasti i parë fatal i regjistruar në lidhje me përdorimin e kësaj metode për kalimin e kufirit drejt Ceutës, një mënyrë e konsideruar veçanërisht e rrezikshme nga autoritetet.

Sipas të dhënave të autoriteteve spanjolle, rreth 80 migrantë kanë humbur jetën gjatë viteve të fundit në përpjekjet për të hyrë në Ceuta. Vetëm gjatë muajit korrik, dy persona nga Afrika Sub-Sahariane humbën jetën në tentativa të ngjashme.

Përdorimi i parashutave për kalimin e kufirit u raportua për herë të parë në vitin 2025, kur një migrant arriti të hynte me sukses në enklavën spanjolle. Që atëherë janë regjistruar edhe raste të tjera të kalimeve përmes kësaj metode.

Ceuta dhe Melilla, dy enklavat spanjolle në bregdetin verior të Afrikës, mbeten pika të rëndësishme të presionit migrator drejt Bashkimit Evropian, ku mijëra persona përpiqen çdo vit të kalojnë nga Maroku në territorin spanjoll.

🔵#Migranti Tentava di raggiungere l'exclave spagnola di #Ceuta dalle montagne del Marocco con un #parapendio, ma è precipitato in mare poco prima dell'atterraggio. È morto così un giovane di origini subsahariane, inutilmente soccorso dalla Guardia Civil. pic.twitter.com/lnawdsKmWv

— Rai Radio1 (@Radio1Rai) August 7, 2026