PRISHTINË, 7 gusht – Kuvendi i Kosovës nuk arriti të përmbyllë procesin e konstituimit të legjislaturës së re brenda afatit 30-ditor të përcaktuar nga Gjykata Kushtetuese, ndërsa seanca do të vazhdojë të shtunën në orën 11:00.

Vendimi për shtyrjen u njoftua nga kryesuesi i seancës, Avni Dehari, pasi deputetët nuk arritën të përfundojnë procedurat për konstituimin e Kuvendit. Afati i vendosur nga Gjykata Kushtetuese skadon në mesnatën e së premtes.

Shtyrja erdhi pas kërkesës së kryeministrit në detyrë dhe kryetarit të Lëvizjes Vetëvendosje, Albin Kurti, i cili kërkoi më shumë kohë për të vijuar konsultimet me partitë parlamentare për krijimin e institucioneve të reja.

Më herët gjatë ditës, Kurti zhvilloi një takim me kryetarin e Lidhjes Demokratike të Kosovës, Lumir Abdixhiku, por bisedimet përfunduan pa marrëveshje.

Vendimi për vazhdimin e seancës pas skadimit të afatit kushtetues është kundërshtuar nga Partia Demokratike e Kosovës, e cila e konsideron shtyrjen në kundërshtim me vendimin e Gjykatës Kushtetuese dhe me funksionimin normal të institucioneve.

Shqetësime kanë shprehur edhe njohës të çështjeve kushtetuese. Eugen Cakolli, nga Instituti Demokratik i Kosovës, e cilësoi shtyrjen si problematike nga pikëpamja kushtetuese.

Ndërkohë, mbetet e paqartë nëse deputetët e opozitës do të marrin pjesë në seancën e së shtunës, ndërsa përpjekjet për arritjen e një marrëveshjeje politike për konstituimin e Kuvendit dhe formimin e institucioneve të reja vazhdojnë.