GREQI, 7 gusht 2026 – Bashkëshorti i 43-vjeçares dhe babai i 21-vjeçarit shqiptar që humbën jetën në aksidentin e rëndë rrugor në Greqi ka folur për mediat, duke përshkruar dhimbjen pas humbjes së dy familjarëve të tij.

"Nuk di çfarë ndodhi. Ata po shkonin në punë. Humbja e tyre është gjithçka për mua", është shprehur ai në një prononcim për mediat greke.

Aksidenti ndodhi mëngjesin e së premtes, rreth orës 07:30, kur automjeti me të cilin udhëtonin 43-vjeçarja dhe djali i saj 21-vjeçar u përplas ballë për ballë me një kamion. Të dy humbën jetën në vendngjarje.

Ndërkohë, autoritetet greke vijojnë hetimet për të përcaktuar shkaqet e aksidentit.

Dëshmi për ngjarjen ka dhënë edhe drejtuesi i kamionit, i cili deklaroi se po lëvizte në korsinë e tij me një shpejtësi rreth 75–80 km/h, kur automjeti i viktimave humbi kontrollin dhe kaloi në korsinë e kundërt.

Sipas tij, ai tentoi të shmangte përplasjen duke devijuar majtas, por nuk arriti ta evitonte aksidentin.

Familja shqiptare jetonte në zonën e Paleokomit. Viktimat punonin në të njëjtën kompani në zonën e plazhit të Ofrinit dhe, sipas raportimeve, po udhëtonin drejt vendit të punës në momentin kur ndodhi aksidenti.

Rrethanat e plota të ngjarjes mbeten nën hetim nga autoritetet greke.