WASHINGTON, 7 gusht 2026 – Një grup dypartiak ligjvënësish amerikanë i ka bërë thirrje administratës së presidentit Donald Trump të vendosë sanksione ndaj zyrtarëve të Republikës Srpska në Bosnje dhe Hercegovinë, pas raportimeve se autorët e një raporti mbi mohimin e gjenocidit të Srebrenicës janë marrë në pyetje nga autoritetet lokale.

Sipas raportimit të Semafor, kërkesa është nënshkruar nga senatorët Jeanne Shaheen, Roger Wicker, Chuck Grassley dhe Dick Durbin, si dhe nga kongresmenët Bill Keating dhe Mike Turner.

Në deklaratën e tyre, ligjvënësit shprehin shqetësim për raportimet se punonjës aktualë dhe ish-punonjës, si edhe bashkëpunëtorë të Qendrës Memoriale të Srebrenicës, janë thirrur për t’u marrë në pyetje nga autoritetet.

Ata i kërkojnë administratës amerikane të zbatojë dispozitat e ligjit vjetor të mbrojtjes, i cili hyri në fuqi në muajin mars dhe autorizon vendosjen e sanksioneve ndaj personave që, sipas vlerësimit të presidentit të SHBA-së, kërcënojnë sigurinë, stabilitetin ose integritetin territorial të vendeve të Ballkanit Perëndimor.

Deri më tani, Shtëpia e Bardhë dhe Departamenti amerikan i Shtetit nuk kanë komentuar publikisht kërkesën.

Kjo nuk është hera e parë që Kongresi amerikan kërkon përdorimin e këtij mekanizmi. Më herët gjatë këtij viti, disa prej të njëjtëve ligjvënës i kërkuan Sekretarit të Shtetit, Marco Rubio, dhe Sekretarit të Thesarit, Scott Bessent, vendosjen e sanksioneve ndaj ish-presidentit të Republikës Srpska, Milorad Dodik, për shkak të qëndrimeve të tij në favor të shkëputjes së entitetit serb nga Bosnje dhe Hercegovina.

Sipas raportimit të Semafor, administrata amerikane kishte hequr më parë sanksionet ndaj Dodikut dhe më pas e priti atë në Uashington gjatë muajit shkurt. Në të njëjtën kohë, Republika Srpska raportohet se ka investuar qindra mijëra dollarë në aktivitete lobimi pranë administratës Trump.

Ish-ndihmëssekretari amerikan i Shtetit për Çështjet Evropiane dhe Euroaziatike, Jim O’Brien, vlerësoi se kjo afërsi politike mund të ketë ndikuar në qëndrimin e administratës ndaj çështjeve që lidhen me gjenocidin e Srebrenicës.

Mbetet ende e paqartë nëse administrata Trump do t’i përgjigjet kërkesës së ligjvënësve dhe do të aktivizojë mekanizmin e ri të sanksioneve për Ballkanin Perëndimor.