TIRANË — Gjykata e Dhomës Penale në Tiranë ka vendosur masën e sigurisë “Arrest në burg” për 32-vjeçaren turke Julide Yazici, e cila u arrestua në aeroportin e Rinasit për llogari të shtetit turk.

Gjatë seancës gjyqësore, prokurori Francesk Ganaj kërkoi caktimin e masës së sigurisë me qëllim ekstradimi, kërkesë e cila u pranua nga gjyqtari Kujtim Vraniçi. Nga ana e saj, e reja me profesion mësuese ka deklaruar para trupit gjykues se është e persekutuar politike, duke argumentuar se akuzat ndaj saj lidhen me protestat e dikurshme kundër qeverisë së presidentit turk Recep Tayyip Erdogan dhe se kthimi në Turqi do t’i rrezikonte jetën.

Yazici, e cila kishte përfituar më parë azil politik në Francë, rezulton e dënuar në Turqi me 4 vjet burgim për pjesëmarrje dhe ndihmë logjistike për organizatë terroriste (ku i kanë edhe rreth 3 vjet e gjysmë për të shlyer). Avokati i saj mbrojtës, Artan Shllaku, kishte kërkuar lirimin e saj dhe kundërshtimin e ekstradimit, por gjykata vendosi ta mbajë në qeli deri në shqyrtimin e plotë të procedurave të ekstradimit.