SERRE / GREQI — Një nënë 43-vjeçe dhe djali i saj 24-vjeçar, të dy shtetas shqiptarë, kanë humbur jetën tragjikisht mëngjesin e kësaj të premteje në një aksident rrugor në afërsi të qytetit të Serres, në Greqi.

Sipas mediave greke, ngjarja e rëndë ka ndodhur rreth orës 07:30 në aksin rrugor Amfipolis–Drama, pranë zonës së Paleokomit, ku automjeti me të cilin udhëtonin viktimat është përplasur kokë më kokë me një kamion. Përplasja ka qenë tejet e fortë, duke shkaktuar vdekjen e menjëhershme të dy shqiptarëve, trupat e të cilëve u transportuan në Spitalin e Përgjithshëm të Serres.

Nga përplasja ka mbetur i plagosur edhe drejtuesi 57-vjeçar i kamionit, i cili është dërguar në Spitalin e Përgjithshëm të Dramës për të marrë ndihmën e nevojshme mjekësore.

Autoritetet policore greke kanë ngritur një grup hetimor dhe po punojnë për të zbardhur shkaqet dhe dinamikën e plotë të këtij aksidenti fatal.