KUKËS — Pika kufitare e Morinit ka regjistruar një fluks të jashtëzakonshëm lëvizjesh gjatë muajit korrik dhe ditëve të para të gushtit, ku qindra mijëra qytetarë nga Kosova dhe diaspora kanë hyrë në territorin e Shqipërisë për pushimet e verës.

Sipas të dhënave zyrtare të Ministrisë së Financave, vetëm gjatë muajit korrik në këtë pikëkalim kufitar janë përpunuar rreth 422 mijë udhëtarë dhe 130 mijë automjete.

Intensiteti i lartë i lëvizjeve ka vijuar edhe në fillimin e muajit të nxehtë të verës. Vetëm në pesë ditët e para të gushtit, përmes Morinit kanë hyrë në Shqipëri mbi 90 mijë pushues, ndërsa fluksi më i lartë u shënua gjatë fundjavës së parë, me afërsisht 50 mijë hyrje.

Rritja e ndjeshme e qarkullimit lidhet me kulmin e sezonit turistik veror, ku bregdeti shqiptar mbetet destinacioni kryesor për qytetarët nga Kosova dhe bashkatdhetarët e diasporës.