SELANIK — Një zog në motorin e avionit ka detyruar autoritetet në aeroportin “Maqedonia” të Selanikut të anulojnë një fluturim drejt Gjermanisë, duke lënë rreth 150 pasagjerë të bllokuar mbrëmjen e së enjtes, më 6 gusht.

Incidenti i pazakontë ndodhi gjatë kontrollit teknik rutinë të avionit para nisjes. Prania e zogut në motor u konstatua nga ekipi teknik, i cili për shkak të rrezikut të lartë për sigurinë e fluturimit vendosi bllokimin e menjëhershëm të mjetit.

Pas zbulimit, autoritetet aktivizuan protokollet standarde të aviacionit për heqjen e shpendit dhe inspektimin e plotë të sistemit të motorit.

Kompania ajrore njoftoi se pasagjerët e prekur do të udhëtojnë drejt Gjermanisë gjatë ditës së sotme, pasi të përfundojnë të gjitha verifikimet e nevojshme teknike që garantojnë sigurinë e plotë të udhëtimit.