ROSKOVEC – Një konflikt mes dy komshinjve për një turë drush ka përfunduar tragjikisht mbrëmjen e së enjtes në lagjen Vrapaj të Roskovecit, ku një 69-vjeçar humbi jetën pasi dyshohet se pësoi infarkt.

Sipas Drejtorisë Vendore të Policisë Fier, viktima është identifikuar si Baftjar Vrapi. Ngjarja ka ndodhur rreth orës 20:00, kur djali i tij është përfshirë në një konflikt fizik me një komshi për motive që lidhen me një turë drush.

Nga të dhënat paraprake rezulton se 69-vjeçari ndodhej në banesë së bashku me bashkëshorten. Pasi është njoftuar për konfliktin dhe ka tentuar të dalë jashtë, ai është ndier keq dhe dyshohet se ka pësuar infarkt, duke u rrëzuar në tokë.

Familjarët kanë njoftuar menjëherë shërbimin e urgjencës, ndërsa i moshuari është transportuar me ambulancë drejt Qendrës Shëndetësore të Roskovecit. Megjithatë, pavarësisht përpjekjeve të mjekëve, ai është konstatuar pa shenja jete.

Burime nga Qendra Shëndetësore e Roskovecit thanë se 69-vjeçari ka mbërritur pa shenja jete dhe me një shenjë mbi vetull. Sipas tyre, nuk mund të përcaktohet nëse ajo shenjë është pasojë e një goditjeje apo është krijuar si rezultat i rrëzimit në tokë. Kjo pritet të sqarohet nga ekspertiza mjeko-ligjore.

Ngjarja ndodhi rreth orës 20:00 të së enjtes, kur mes familjeve Vrapi dhe Hoxhaj ka nisur një debat për një grumbull drush. Sipas versionit zyrtar të Policisë, 69-vjeçari doli së bashku me bashkëshorten dhe, teksa pa konfliktin mes familjarëve, humbi ndjenjat dhe u rrëzua në tokë.

Ndërkohë, disa banorë të zonës tregojnë se, Baftjar Vrapi ndodhej në verandën e banesës dhe ka parë konfliktin mes djalit të tij dhe komshiut, përpara se të pësonte infarktin.

Policia po vijon hetimet për të sqaruar plotësisht rrethanat e ngjarjes dhe dinamikën e konfliktit. Personat e përfshirë janë shoqëruar dhe po merren në pyetje, ndërsa grupi hetimor po punon për dokumentimin e plotë të rastit.