Policia Kufitare e Vlorës ka bllokuar një mjet lundrues tip Jet Ski dhe ka ndëshkuar drejtuesin e tij me një masë administrative prej 300 mijë lekësh, pasi u konstatua duke lundruar brenda perimetrit të sigurisë, në zonën ku po laheshin pushuesit.

Sipas njoftimit të Drejtorisë Vendore për Kufirin dhe Migracionin Vlorë, shërbimet e Policisë Kufitare, në bashkëpunim me Njësinë Policore Detare, kanë intensifikuar kontrollet dhe patrullimet përgjatë vijës bregdetare për garantimin e sigurisë së pushuesve dhe zbatimin e rregullave të lundrimit.

Gjatë një patrullimi në vendin e njohur si "Plazhi i Hidrovorit", në zonën e Zvërnecit, efektivët konstatuan mjetin lundrues duke hyrë në hapësirën e rezervuar për pushuesit, duke rrezikuar jetën dhe sigurinë e tyre.

Pas përfundimit të procedurave administrative, mjeti u bllokua, ndërsa ndaj poseduesit të tij, shtetasit me iniciale A. V., u vendos gjobë në vlerën 300 mijë lekë, në përputhje me legjislacionin në fuqi.

Policia e Shtetit u bën thirrje të gjithë përdoruesve të mjeteve lundruese dhe subjekteve që operojnë me to të respektojnë perimetrat e sigurisë dhe rregullat e lundrimit, duke shmangur hyrjen në zonat e përcaktuara për pushuesit. Sipas autoriteteve, çdo shkelje që cenon sigurinë në plazhe do të ndëshkohet në përputhje me ligjin.