Policia e Himarës ka shpallur në kërkim ish-zyrtarin e Policisë së Shtetit, Uljan Shpataraku, pas një kallëzimi të depozituar nga punonjësit e një hoteli në zonën e Dhërmiut.

Sipas pretendimeve të kallëzuesve, ngjarja ka ndodhur pas një debati verbal, gjatë të cilit Shpataraku dyshohet se i ka kanosur dhe kërcënuar me jetë punonjësit e hotelit.

Burime bëjnë me dije se Shpataraku, i cili më herët ka mbajtur funksione në Policinë e Shtetit dhe konsiderohej një nga bashkëpunëtorët më të afërt të ish-drejtorit të Përgjithshëm të Policisë, Ilir Proda, është aktualisht i përjashtuar nga radhët e policisë.

Pak ditë më parë, ai iu drejtua gjykatës duke kërkuar rikthimin në detyrë. Ndërkohë, lidhur me kallëzimin e fundit, Policia ka nisur veprimet procedurale dhe vijon punën për lokalizimin e tij dhe zbardhjen e plotë të rrethanave të ngjarjes.