Virusi i Nilit Perëndimor po vijon të përhapet në disa vende europiane, duke shkaktuar dhjetëra raste të konfirmuara dhe viktima gjatë këtij sezoni.

Sipas të dhënave të Qendrës Europiane për Parandalimin dhe Kontrollin e Sëmundjeve (ECDC), deri më 29 korrik raste të infektimit janë raportuar në Itali, Greqi, Rumani, Francë, Maqedoninë e Veriut, Spanjë dhe Gjermani. Në total janë identifikuar 49 zona të prekura në shtatë vende europiane, ku 30 prej tyre ndodhen në Itali.

Italia rezulton vendi më i prekur me 94 raste të konfirmuara, ndërsa Greqia renditet e dyta me 65 raste. Maqedonia e Veriut dhe Spanja kanë raportuar nga shtatë raste, Rumania pesë, Franca dy dhe Gjermania një rast.

Në Greqi, situata është përkeqësuar gjatë javëve të fundit. Vetëm në javën e fundit janë regjistruar 23 raste të reja, ndërsa që nga fillimi i sezonit të transmetimit numri total ka arritur në 65. Nga personat e infektuar, 54 kanë zhvilluar komplikacione serioze neurologjike, përfshirë encefalitin, meningjitin ose paralizën akute.

Gjashtë viktimat e raportuara në Greqi kanë qenë mbi moshën 65 vjeç dhe kanë pësuar komplikacione të rënda në sistemin nervor qendror. Autoritetet shëndetësore paralajmërojnë se numri real i rasteve mund të jetë më i lartë, pasi një pjesë e personave të infektuar mund ta kalojnë virusin me simptoma të lehta ose pa shenja të dukshme.

Rastet në Greqi janë regjistruar në 25 bashki të rajoneve të Atikës, Thesalisë dhe Maqedonisë Qendrore. Aktualisht, 20 pacientë po marrin trajtim në spitale, ndërsa disa prej tyre ndodhen në terapi intensive.

Çfarë është virusi i Nilit Perëndimor?

Virusi i Nilit Perëndimor transmetohet kryesisht përmes pickimit të mushkonjave të infektuara. Mushkonjat e marrin virusin nga zogjtë bartës dhe më pas mund ta transmetojnë te njerëzit ose kuajt.

Shumica e personave të infektuar nuk shfaqin simptoma. Në rastet kur ato shfaqen, mund të përfshijnë temperaturë, dhimbje koke, lodhje, dhimbje muskujsh dhe irritime të lëkurës.

Në raste më të rralla, veçanërisht te të moshuarit dhe personat me imunitet të dobësuar, infeksioni mund të shkaktojë probleme të rënda neurologjike, si meningjiti dhe encefaliti.

Virusi u identifikua për herë të parë në vitin 1937 në Ugandë, në zonën West Nile, nga e cila ka marrë edhe emrin.