Autoritetet greke kanë vendosur masa të rrepta kufizuese në zonën e Kosturit (Kastoria), pas konfirmimit të vatrave të lisë së deleve dhe dhive në një fermë pranë Argos Orestikos.

Për të frenuar përhapjen e sëmundjes, janë shtuar kontrollet veterinare, ndërsa në qytet dhe fshatrat përreth është ndaluar lëvizja e bagëtive. Në të gjithë rajonin janë pezulluar shitblerja dhe transporti i kafshëve të gjalla, ndërsa kullotja është ndaluar brenda zonave të përcaktuara.

Sipas masave të ndërmarra nga autoritetet, therja e kafshëve lejohet vetëm në thertoren më të afërt dhe me autorizimin e shërbimit veterinar. Rreth fermës së prekur është krijuar një zonë mbrojtjeje me rreze pesë kilometra dhe një zonë mbikëqyrjeje prej 20 kilometrash.

Lija e deleve dhe dhive është një sëmundje virale shumë ngjitëse që prek vetëm këto kafshë. Simptomat përfshijnë temperaturë, dobësi, humbje të oreksit dhe shfaqjen e dëmtimeve në lëkurë. Në raste të rënda, sëmundja mund të shkaktojë probleme të frymëmarrjes dhe ngordhjen e kafshëve.

Virusi përhapet kryesisht përmes kontaktit të drejtpërdrejtë mes kafshëve, por edhe përmes mjeteve, pajisjeve, veshjeve dhe ambienteve të kontaminuara. Për shkak të aftësisë së tij për të mbijetuar për periudha të gjata në lesh dhe stalla të papastruara, kontrolli i sëmundjes paraqet vështirësi të mëdha.

Autoritetet greke kanë sqaruar se kjo sëmundje nuk transmetohet te njerëzit dhe nuk ka lidhje me linë humane. Sipas tyre, produktet e mishit dhe qumështit që kalojnë kontrollet zyrtare mbeten të sigurta për konsum.

Problemi është shtrirë edhe në zona të tjera të Greqisë. Sipas të dhënave të raportuara në sistemin europian, gjatë vitit 2026 deri më 5 gusht janë regjistruar 214 vatra të sëmundjes në vend. Vetëm gjatë javës së fundit janë konfirmuar tetë vatra të reja, kryesisht në Greqinë Perëndimore dhe në Peloponez.

Epidemia aktuale nisi në gusht të vitit 2024. Deri më 19 prill 2026, autoritetet greke kishin raportuar mijëra vatra në ferma të ndryshme, ndërsa qindra mijëra dele dhe dhi ishin asgjësuar si masë për të kufizuar përhapjen e virusit.

Megjithëse nuk përbën rrezik për shëndetin publik, sëmundja ka shkaktuar pasoja të rënda ekonomike për blegtorinë greke, duke prekur prodhimin e qumështit, mishit dhe produkteve tradicionale si djathi feta.