Detaje të reja kanë dalë në dritë lidhur me vrasjen e 38-vjeçares skoceze Elizabeth, trupi i së cilës u gjet brenda një valixheje në zonën e Kypselit, në Athinë, në mesin e muajit korrik.

Sipas mediave britanike, 26-vjeçari afgan Sharif Ahmadzai është lënë në paraburgim, ndërsa autoritetet greke e konsiderojnë dëshminë e bashkëshortes së tij, shtetases amerikane Alaina, si një element të rëndësishëm në ecurinë e hetimeve.

Në deklarimin e saj, Alaina tha se ajo dhe bashkëshorti ishin njohur me Elizabeth gjatë aktivitetit vullnetar në një organizatë bamirëse për refugjatët në Athinë, në shkurt të vitit 2026. Ajo e përshkroi viktimën si një person të sjellshëm dhe me shpirt human.

Sipas dëshmisë, më 12 korrik Elizabeth i kishte ftuar për një shëtitje, ndërsa më pas kishte mbetur vetëm me Ahmadzain. Dyshohet se të dy kanë vijuar të komunikojnë edhe në ditët pasuese, ndërsa më 15 korrik viktima i kishte dërguar të riut një mesazh falënderues për gatishmërinë për ta shoqëruar në shpërndarjen e Biblave.

Alaina deklaroi se gjatë natës së 15 korrikut zbuloi se bashkëshorti ishte larguar nga banesa pa e njoftuar. Duke kontrolluar vendndodhjen e tij në telefon, ajo pa se ndodhej në apartamentin e Elizabeth. Kur e pyeti, ai i tha se kishte dalë për të parë një ndeshje futbolli dhe se kishte hyrë në apartament vetëm për të përdorur banjën. Sipas hetimeve, i dyshuari ka pranuar se kishte shkuar në banesën e viktimës atë ditë.

Fillimisht, Alaina tha se i besoi shpjegimeve të bashkëshortit. Megjithatë, dyshimet u shtuan pasi mediat raportuan gjetjen e trupit të një gruaje brenda një valixheje në Kypseli. Më 29 korrik ajo tentoi të kontaktonte Elizabeth përmes mesazheve, por përgjigjet që mori i konsideroi të pazakonta.

Sipas saj, mënyra e të shkruarit dhe përdorimi i emoji-ve nuk përputheshin me stilin e zakonshëm të viktimës. Pasi nuk arriti ta kontaktonte me telefon dhe autoritetet identifikuan zyrtarisht trupin si atë të Elizabeth, Alaina deklaroi se u largua nga banesa për arsye sigurie.

Hetimet për zbardhjen e plotë të ngjarjes vijojnë, ndërsa Sharif Ahmadzai përballet me akuzat për vrasjen e 38-vjeçares. Çështja mbetet nën shqyrtim nga autoritetet greke dhe përgjegjësia penale e të dyshuarit do të përcaktohet nga gjykata.