TIRANË — Edhe pse kanë kaluar pesë muaj nga dasma e tyre brenda shtëpisë më të famshme në Shqipëri, ish-banorët e edicionit të pestë të "Big Brother VIP Albania", Selin Bollati dhe Gëzim Blakaj (DJ Gimbo), vazhdojnë të festojnë datën e tyre të veçantë.

Selin, e cila u shpall fituese e këtij edicioni, ka ndarë me ndjekësit e saj në "Instastory" një bisedë private të shkëmbyer me partnerin. Në mesazhe, balerina e pyet Gimbon se "sa është data sot?", ndërsa ai i përgjigjet shkurt me numrin "5", duke iu referuar datës 5 mars, ditës kur ata organizuan ceremoninë martesore brenda formatit televiziv.

Krahas fotos së bisedës, Selin ka vendosur mbishkrimin: "Kush do t’i tregojë?". Më vonë, DJ Gimbo i ka shkruar me humor duke iu referuar reagimit të saj në rrjetet sociale: "Ti domethënë në story aty menjëherë".

Kujtojmë se gjatë një interviste të mëvonshme për emisionin "Pushime On Top", duke folur për raportin e tyre jashtë shtëpisë, Selin u shpreh se lidhja e tyre nuk është parë kurrë si një romancë klasike, por se ata kanë ndërtuar një marrëdhënie shumë të shëndetshme që shpesh është keqkuptuar nga publiku.