FUSHË-ARRËZ — Kryepleqtë dhe banorët e nëntë fshatrave të Njësisë Administrative Fierzë janë mbledhur në një kuvend të përbashkët pranë Kishës së Fierzës, për të kundërshtuar njëzëri projektin për shkrirjen e Bashkisë Fushë-Arrëz dhe bashkimin e saj me Pukën.

Gjatë takimit, banorët dhe përfaqësuesit e zonës argumentuan se largësia gjeografike prej rreth 100 kilometrash nga Puka e bën të pamundur shërbimin efikas ndaj qytetarëve, duke u shprehur se për marrjen e një letre apo shërbimi administrativ "Puka është larg sa Kina". Ata gjithashtu ngritën shqetësimin për mungesën e vullnetit institucional për të investuar në zonat rurale gjatë tri dekadave të fundit.

Si shembuj të braktisjes institucionale, banorët përmendën mungesën e investimeve në rrjetin e furnizimit me energji elektrike — pavarësisht se zona furnizon me energji të gjithë vendin — si dhe mangësitë e theksuara në infrastrukturën arsimore.

Në përfundim të kuvendit, kryepleqtë e fshatrave bënë të ditur se banorët e Fierzës do t’i bashkohen protestës së paralajmëruar për nesër, 7 gusht, në Fushë-Arrëz, ku do të kundërshtojnë zyrtarisht draftin e propozuar nga Partia Socialiste për reformën territoriale.