HAGË — Dhomat e Specializuara të Kosovës kanë zyrtarizuar kalendarin për fazën përfundimtare të gjykimit ndaj Hashim Thaçit dhe katër të bashkëakuzuarve të tij, Bashkim Smakajt, Isni Kilajt, Fadil Fazliut dhe Hajredin Kuçit.

Sipas njoftimit zyrtar, seancat për dëgjimin e deklaratave përmbyllëse do të zhvillohen më 10, 11 dhe 14 shtator 2026, duke nisur nga ora 09:30. Ky vendim vjen pasi, më 5 gusht 2026, gjykatësi i vetëm mbylli zyrtarisht procedurën e paraqitjes së provave, duke i hapur rrugë aktit final të gjykimit që kishte nisur më 27 shkurt 2026.

Të pandehurit janë deklaruar të pafajshëm për veprat penale që lidhen me pengimin e administrimit të drejtësisë dhe mosbindjen ndaj urdhrave të gjykatës.

Seancat do të jenë plotësisht publike dhe do të transmetohen në gjuhën shqipe, serbe dhe angleze në faqen zyrtare të Dhomave të Specializuara. Ndërkohë, gazetarët dhe qytetarët e interesuar për të ndjekur punimet nga afër në sallë duhet të aplikojnë për regjistrim paraprak, ku afati i fundit për dorëzimin e kërkesave është caktuar data 14 gusht 2026, deri në ora 18:00.