PRISHTINË — Lëvizja Vetëvendosje (LVV) nuk ka propozuar sot një emër për kryeparlamentar të Kosovës, duke kërkuar kohë shtesë për bisedime të mëtejshme me partitë opozitare për arritjen e një marrëveshjeje.

Gjatë seancës, drejtuesi i LVV-së, Albin Kurti, deklaroi se procesi i konstituimit nuk duhet ta çojë vendin sërish në zgjedhje të parakohshme.

"Zgjedhjet e 7 qershorit janë të tretat brenda 17 muajve. Falënderoj krerët e PDK-së dhe LDK-së për bisedimet, ndërsa kemi zhvilluar bisedime edhe me AAK-në", u shpreh Kurti, duke shtuar se konstituimi nuk duhet të prodhojë zgjedhje të panevojshme dhe të paarsyeshme, ndaj kërkohet kohë shtesë për të siguruar një konsensus për çështjen e presidentit dhe institucioneve të reja.

Pas kërkesës së bërë për shtyrjen e afateve të konsultimeve politike, drejtuesi i seancës, Avni Dehari, ka vendosur të shtyjë seancën konstituive për një datë tjetër.