PALASË — Një 33-vjeçare nga Gjermania ka humbur jetën paraditen e djeshme në Palasë, pasi dyshohet se ka pësuar arrest kardiak gjatë qëndrimit të saj në bregdet.

Sipas Policisë së Vlorës, ngjarja është regjistruar rreth orës 11:45, kur Stacioni i Policisë Dhërmi është njoftuar nga Qendra Shëndetësore e Palasës se në ambientet e saj ishte transportuar pa ndjenja shtetasja gjermane me inicialet M. S., e cila kishte shfaqur probleme të papritura shëndetësore. Pavarësisht ndërhyrjes së menjëhershme të stafit mjekësor, e reja nuk ka mundur të mbijetojë.

Nga veprimet paraprake hetimore, autoritetet policore bëjnë me dije se bëhet fjalë për një vdekje natyrale, e shkaktuar dyshohet nga arresti kardiak.

Pas marrjes së njoftimit, shërbimet e Policisë kanë shkuar në vendngjarje dhe kanë kryer veprimet procedurale, në bashkëpunim me grupin hetimor dhe nën drejtimin e Prokurorisë. Materialet procedurale i janë referuar organit të akuzës, i cili do të vijojë me hetimet e mëtejshme për të zbardhur plotësisht rrethanat e ngjarjes.