GRAMSH — Një aksion i pazakontë i shërbimit zjarrfikës në Gramsh për të lehtësuar ndikimin e temperaturave të larta ka tërhequr vëmendjen e gazetës prestigjioze italiane “Corriere della sera”, në një kohë kur valët e të nxehtit kanë përfshirë vendin.

Automjetet e zjarrfikësve kanë kaluar nëpër rrugët e qytetit duke spërkatur ujë dhe krijuar një mjegull freskuese për qytetarët, ndërsa termometri në zonë ka arritur deri në 38 gradë Celsius. Dhjetëra banorë kanë dalë nga shtëpitë për të gjetur freski, duke e shndërruar këtë ndërhyrje në një festë spontane në rrugë, të shoqëruar me muzikë dhe atmosferë festive.

Kjo ngjarje vjen në një periudhë kur pjesë të mëdha të Evropës po përballen me temperatura rekord. Sipas programit evropian “Copernicus”, Evropa mbetet kontinenti që po ngrohet më shpejt në botë, ndërsa valët ekstreme të të nxehtit vazhdojnë të rrisin rrezikun e zjarreve pyjore dhe fenomeneve të tjera ekstreme klimatike.