Presidenti i Serbisë, Aleksandar Vuçiç, ka deklaruar se Republika Srpska ka luajtur një rol vendimtar në mosnjohjen e pavarësisë së Kosovës nga Bosnja dhe Hercegovina.

Gjatë fjalës së mbajtur në ceremoninë përkujtimore për viktimat e operacionit ushtarak kroat "Storm", të zhvilluar në Mrkonjić Grad, Vuçiç shprehu mirënjohjen e tij ndaj Republikës Srpska, duke theksuar se qëndrimi i saj ka ndikuar në politikën e jashtme të Bosnjës dhe Hercegovinës.

"Vetëm falë Republikës Srpska, Bosnja dhe Hercegovina mbetet ushtarakisht neutrale. Vetëm falë Republikës Srpska, Bosnja dhe Hercegovina nuk e njohu pavarësinë e Kosovës. Përndryshe, në Sarajevë dhe Mostar do të ishin të gatshëm ta bënin këtë," deklaroi Vuçiç.

Presidenti serb u shpreh gjithashtu se, sipas tij, një Serbi e pavarur ka qenë vazhdimisht objekt kundërshtimesh nga fuqitë e mëdha, duke shtuar se kjo situatë vazhdon edhe sot.

Në fjalën e tij, Vuçiç iu referua edhe Malit të Zi, duke pretenduar se rreth gjysma e qytetarëve flasin gjuhën serbe, por ajo nuk gëzon statusin e gjuhës zyrtare.

Në përfundim, presidenti serb falënderoi Republikën Srpska dhe qytetarët e saj për, sipas tij, ruajtjen e lidhjeve të ngushta me Serbinë dhe mbështetjen e vazhdueshme ndaj interesave të saj.