TIRANË – Kryetari i Partisë Demokratike, Sali Berisha, ka dënuar me ashpërsi vendimin për shpalljen "non grata" dhe ndalimin e hyrjes në Shqipëri të gazetarit nga Maqedonia e Veriut, Valon Bela. Gjatë deklaratës së tij, Berisha e cilësoi këtë akt si një atentat të rëndë kundër fjalës së lirë dhe lirisë së mendimit.

Kreu i PD-së e quajti gazetarin një luftëtar të lirisë dhe ish-luftëtar të UÇK-së, duke theksuar se ndalimi i tij u bë për shkak të shkrimeve kritike dhe denoncimeve publike ndaj Kryeministrit Edi Ramës. Ai akuzoi qeverinë se po zbaton praktika autoritare të ngjashme me regjimet fqinje.

Në fjalën e tij, Berisha kritikoi ashpër edhe organizatat e gazetarëve në vend për mungesë reagimi:

"Është në turpin e organizatave shqiptare të mbrojtjes së gazetarëve që nuk kanë ende asnjë prononcim. Në turpin e lor tregon varësinë dhe kontrollin qeveritar."

Gjithashtu, ai u bëri thirrje organizatave ndërkombëtare të ngrenë zërin kundër këtij akti, duke e cilësuar si një shkelje të hapur të të drejtave të gazetarëve dhe një shenjë të kontrollit politik mbi institucionet shtetërore.