TIRANË – Vatra e zjarrit në zonën e Qafë-Mollës, në Njësinë Administrative Zall-Bastar të Bashkisë Tiranë, vijon të mbetet aktive prej 10 ditësh, duke shkaktuar dëme të konsiderueshme në fondin pyjor.

Flakët kanë shkrumbuar deri më tani rreth 8 hektarë sipërfaqe pyjore, të mbjella kryesisht me lisa dhe dushqe. Për shkak të terrenit të vështirë malor, ndërhyrja e mjeteve zjarrfikëse nga toka është bërë e pamundur.

Për vënien nën kontroll të flakëve është angazhuar një helikopter, ndërsa në terren po operojnë punonjësit e Njësisë Administrative Zall-Bastar të mbështetur nga banorët e zonës. Autoritetet po mbajnë situatën nën monitorim të vazhdueshëm për të shmangur rrezikun e përhapjes së flakëve drejt zonave të banuara, të favorizuara edhe nga era.