ELBASAN – Specialistët e Seksionit për Hetimin e Trafiqeve në DVP Elbasan, në bashkëpunim me Forcën e Posaçme Operacionale dhe atë “Shqiponja”, kanë finalizuar dy operacione të njëpasnjëshme policore të koduara “Aksi” dhe “Aksi 01”, duke goditur aktivitetin e paligjshëm të dhënies së ndihmës emigrantëve për kalim të paligjshëm të kufirit.

Si rezultat i ndërhyrjeve në aksin rrugor “Librazhd–Elbasan”, janë vënë në pranga tre persona dhe janë sekuestruar dy automjete:

Operacioni “Aksi”: U arrestua në flagrancë shtetasi F. M., 22 vjeç, banues në Elbasan, pasi u kap duke transportuar 14 emigrantë nga vendet e treta që kishin hyrë ilegalisht në Shqipëri me synim vendet e Bashkimit Evropian.

Operacioni “Aksi 01”: U arrestuan në flagrancë shtetasit A. R., 23 vjeç dhe D. Ç., 24 vjeç, të dy banues në Përrenjas, të cilët u kapën duke transportuar 10 emigrantë të tjerë të paligjshëm. Nga verifikimet e mëtejshme rezultoi se drejtuesi i mjetit, shtetasi A. R., po lëvizte pa leje drejtimi.

Materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme penale.

Njoftimi:

DVP Elbasan/Finalizohen nga Seksioni për Hetimin e Trafiqeve, 2 operacione të njëpasnjëshme kundër dhënies ndihmë emigrantëve, për kalim ilegal të kufijve drejt BE-së.

Kapen në aksin “Librazhd–Elbasan”, dhe vihen në pranga 3 shtetas që transportonin në 2 raste, 24 emigrantë që kishin hyrë ilegalisht, në Shqipëri.

Njëri prej tyre e drejtonte automjetin me të cilin transportonte emigrantët, pa leje drejtimi.

Sekuestrohen 2 automjetet.

Si rezultat i administrimit të shpejtë të informacioneve të siguruara në rrugë operative, për shtetas të përfshirë në veprimtarinë kriminale të transportimit kundrejt pagesave, të emigrantëve nga Vendet e Treta, të cilët synojnë të shkojnë ilegalisht, në shtete të BE-së, specialistët e Seksionit për Hetimin e Trafiqeve, në bashkëpunim me shërbimet e Forcës së Posaçme Operacionale dhe Forcës së Posaçme "Shqiponja", finalizuan 2 operacione të njëpasnjëshme në këtë fushë.

Konkretisht, nga 2 ndërhyrjet e kryera në aksin rrugor “Librazhd–Elbasan”, u finalizuan operacionet e koduara: -“Aksi”, gjatë të cilit u arrestua në flagrancë, duke transportuar 14 emigrantë, shtetasi F. M., 22 vjeç, banues në Elbasan; -“Aksi 01”, gjatë të cilit u arrestuan në flagrancë, duke transportuar 10 emigrantë, shtetasit A. R., 23 vjeç dhe D. Ç., 24 vjeç, të dy banues në Përrenjas. Nga verifikimet e mëtejshme, rezultoi se shtetasi A. R. e drejtonte automjetin me të cilin transportonte emigrantët, pa leje drejtimi.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.