FIER – Drejtoria Vendore e Policisë Fier ka ndërmarrë një valë kontrollesh të shtuara në të gjithë qarkun, me fokus parandalimin e ngjarjeve kriminale dhe rritjen e parametrave të sigurisë publike gjatë këtij sezoni veror.

Masat e reja parashikojnë verifikime të imtësishme në akset kryesore rrugore dhe zonat me frekuentim të lartë, duke u përqendruar te automjetet e dyshimta dhe personat me precedentë të mëparshëm penalë.

Sipas autoriteteve policore, intensifikimi i kontrolleve vjen si pasojë e fluksit të lartë të lëvizjeve nga emigrantët dhe turistët gjatë verës, si dhe pas ngjarjeve të fundit kriminale në vend, me synim shmangien e konflikteve, hakmarrjeve apo atentateve të mundshme. Policia bën me dije se operacionet e posaçme do të vijojnë përgjatë gjithë sezonit.