RROGOZHINË – Policia e Shtetit ka vënë në pranga autorin e dyshuar të një zjarrvënieje në fshatin Lekaj të Rrogozhinës, ngjarje e cila shkaktoi dëme të konsiderueshme materiale duke shkrumbuar rreth 250 pemë ulliri dhe pemë të tjera frutore.

Pas marrjes së njoftimit për vatrën e zjarrit që rrezikonte banesat përreth, shërbimet e Komisariatit të Policisë Kavajë, në bashkëpunim me shërbimet zjarrfikëse, ndërhynë në terren për izolimin dhe shuarjen e flakëve.

Nga hetimet paraprake rezultoi se zjarri ishte ndezur në oborrin e banesës së shtetasit N. U. dhe më pas ishte përhapur në pjesën e pasme të pronës. Në përfundim të veprimeve hetimore, specialistët e Hetimit të Krimeve arrestuan në flagrancë shtetasin N. U., banues në Lekaj, për veprën penale “Shkatërrimi i pronës me zjarr”.

Drejtoria Vendore e Policisë Durrës i bën apel qytetarëve të abstenojnë nga ndezja e zjarreve për pastrimin e mbetjeve bimore, duke kujtuar se çdo pakujdesi apo zjarrvënie e qëllimshme përbën vepër penale dhe rrezikon seriozisht jetën, pronën dhe mjedisin.