Një valë sulmesh ruse me raketa balistike dhe dronë goditi Kievin dhe zonat përreth në orët e para të mëngjesit të së mërkurës, duke lënë të paktën 14 persona të vrarë dhe 22 të plagosur, sipas autoriteteve ukrainase.

Kreu i administratës ushtarake të Kievit, Timur Tkachenko, bëri të ditur se sulmet nisën menjëherë pas mesnatës dhe u shoqëruan me alarm ajror që zgjati për më shumë se një orë. Goditjet shkaktuan dëme të konsiderueshme në ndërtesa banimi, depo dhe objekte të infrastrukturës civile.

Sipas autoriteteve lokale, nëntë viktima u regjistruan në distriktin Boryspil, katër në Bucha dhe një në Fastiv. Kryebashkiaku i Kievit, Vitali Klitschko, deklaroi se ekipet e emergjencës vijojnë operacionet e kërkim-shpëtimit, pasi dyshohet se persona të tjerë mund të jenë ende nën rrënoja. Ai shtoi se katër nga të plagosurit ndodhen në gjendje të rëndë.

Nga ana tjetër, Ministria ruse e Mbrojtjes deklaroi se objektivat e sulmit ishin qendra logjistike dhe pika furnizimi me armatime në Kiev dhe rajonet përreth, si edhe tre anije mallrash pranë portit të Odesës, të cilat, sipas Moskës, transportonin pajisje ushtarake.

Autoritetet ukrainase e kanë dënuar sulmin, duke akuzuar Rusinë për goditje të qëllimshme ndaj zonave civile. Moska, ndërkaq, i ka mohuar këto akuza, duke këmbëngulur se sulmet synojnë vetëm objektiva ushtarake.

Ky sulm vjen në një periudhë të përshkallëzimit të luftimeve mes dy vendeve. Ukraina ka intensifikuar sulmet me dronë ndaj objektivave në territorin rus, ndërsa Rusia ka shtuar bombardimet ndaj qyteteve ukrainase.

Ndërkohë, Kievi ka përsëritur thirrjen ndaj aleatëve perëndimorë për furnizim me sisteme shtesë të mbrojtjes ajrore, përfshirë bateritë Patriot dhe raketat interceptuese, për të përballuar sulmet e vazhdueshme me raketa balistike.