Një episod i pakëndshëm i ndodhi ish-futbollistit dhe drejtuesit sportiv shqiptar, Igli Tare, gjatë kthimit nga Milano drejt Romës, pas pjesëmarrjes në ceremoninë mortore të legjendës së Milanit, Franco Baresi.

Sipas mediave italiane, Tare kishte marrë pjesë në homazhet e zhvilluara në Kishën e Sant’Ambrogios në Milano. Gjatë udhëtimit me tren drejt Romës, persona ende të paidentifikuar në atë moment i vodhën çantën, e cila ndodhej në bagazhieren mbi sedilje.

Menjëherë pasi mbërriti në stacionin Termini, Tare denoncoi vjedhjen pranë Policisë Hekurudhore. Falë pamjeve të kamerave të sigurisë, efektivët arritën të identifikonin autorin brenda pak minutash.

I dyshuari u lokalizua dhe u arrestua, ndërsa çanta me sendet personale iu rikthye pronarit.

Policia Hekurudhore e Lazios e bëri publik rastin edhe në rrjetet sociale, duke theksuar rëndësinë e denoncimit të menjëhershëm të rasteve të tilla. Sipas autoriteteve, reagimi i shpejtë i Tares dhe përdorimi i sistemit të videomonitorimit bënë të mundur identifikimin e autorit dhe rikuperimin e çantës në një kohë shumë të shkurtër.

Një ditë që nisi me pjesëmarrjen në një ceremoni të trishtë përfundoi me një rezultat pozitiv për ish-drejtuesin sportiv shqiptar, falë ndërhyrjes së shpejtë të policisë italiane.

View this post on Instagram

A post shared by Polizia di Stato – Italy (@poliziadistato)