Protesta qytetare kundër qeverisë ka hyrë sot në ditën e 66-të, me qytetarët që janë mbledhur fillimisht në sheshin “Skënderbej” dhe më pas kanë marshuar drejt bulevardit “Dëshmorët e Kombit”, përpara Kryeministrisë.

Gjatë tubimit, protestuesit kanë kërkuar sërish dorëheqjen e kryeministrit Edi Rama dhe të qeverisë së tij. Në shesh janë dëgjuar edhe thirrje të ndryshme politike, ndërsa protestuesit kanë shpalosur një mesazh gjigant: “Koha për llogari”.

Tubimi është shoqëruar edhe me reagime kundër reformës së re territoriale, e cila ka shkaktuar protesta edhe në disa qytete të vendit.

Aktivisti Edison Lika deklaroi se kundërshtimet ndaj kësaj reforme lidhen me frikën, sipas tij, për përqendrimin e pushtetit vendor në më pak duar.

“Pikërisht tani po bëhet kjo reformë, sepse duan që pushteti lokal të grumbullohet gjithnjë e më shumë në më pak duar”, u shpreh ai gjatë protestës.

Edhe aktivisti Ilir Xhemalaj kritikoi planin për riorganizimin territorial, duke përmendur si shembuj bashkitë e Libohovës, Belshit dhe Patosit, për të cilat pretendoi se rrezikojnë të preken nga ndryshimet e propozuara.

Ai ngriti gjithashtu shqetësime për situatën ekonomike, rritjen e çmimeve dhe largimin e qytetarëve nga vendi, duke e lidhur këtë me politikat e qeverisë.

Protestuesit deklaruan se do të vijojnë tubimet deri në realizimin e kërkesave të tyre, ndërsa protesta e radhës pritet të zhvillohet në ditët në vijim.