Presidenti i Ukrainës, Volodymyr Zelensky, ka publikuar një video në rrjetet sociale, ku sipas tij paraqitet një dron rus duke ndjekur dhe goditur një civil në rajonin e Khersonit, në jug të Ukrainës.

Në pamjet e shpërndara nga presidenti ukrainas, një dron shihet duke ndjekur një burrë, i identifikuar më pas si një shitës ambulant, teksa përpiqet të largohet në një rrugë të qytetit. Pajisja fluturuese e ndjek për disa momente, përpara se të përplaset me të dhe të shpërthejë.

Sipas një mjeku, qytetari ka mbijetuar, por ka pësuar plagë nga copëzat e shpërthimit, tronditje dhe trauma.

Zelensky e ka cilësuar ngjarjen si një shembull të sulmeve të ashtuquajtura “safari” ndaj civilëve, duke bërë thirrje që komuniteti ndërkombëtar të shohë, sipas tij, provat e sulmeve ndaj popullsisë civile.

“Bota duhet ta shohë këtë”, shkroi presidenti ukrainas në platformën Telegram, duke akuzuar forcat ruse për sulme të drejtuara ndaj civilëve.

Edhe ministri i Jashtëm i Ukrainës, Andrii Sybiha, e ka cilësuar videon si dëshmi të një krimi lufte, duke deklaruar se sulme të tilla janë pjesë e një fushate për të frikësuar banorët e zonave pranë vijës së frontit.

Më pas, guvernatori i rajonit të Khersonit publikoi pamje nga spitali, ku qytetari i identifikuar si Yuriy, një shitës ambulant perimesh 52-vjeçar, rrëfeu momentet para sulmit. Sipas dëshmisë së tij, ai dhe bashkëshortja e tij po vendosnin arka me perime pranë furgonit të tyre, kur dëgjuan zhurmën karakteristike të dronit.

Yuriy tha se tentoi t’i tregonte operatorit të dronit se ishte civil, duke ngritur disa produkte drejt kamerës së pajisjes, por pavarësisht kësaj, droni vijoi ndjekjen.

Sipas verifikimeve të BBC Verify, videoja është lokalizuar në një zonë tregu pranë një rrethrrotullimi në lagjen Tavriiskyi, në veri të Khersonit. Megjithatë, nuk është bërë e ditur se kush e ka regjistruar sulmin dhe si është siguruar pamja.

Sulmet me dronë ndaj civilëve në zonat pranë vijës së frontit në Kherson janë raportuar edhe më herët. Një raport i Kombeve të Bashkuara i vitit 2025 ka dokumentuar raste të vrasjeve dhe plagosjeve të civilëve në këtë zonë nga sulme me dronë, duke i atribuar ato forcave ruse.

Autoritetet ukrainase kanë kërkuar hetim ndërkombëtar për këto raste, ndërsa pala ruse nuk ka reaguar lidhur me videon e publikuar.

Today, many were shocked by yet another video of the drone “safari” Russians are carrying out against civilians in Kherson. A Russian drone deliberately hunted down a man selling vegetables and detonated right next to him. The Russians even admitted to the crime, showing zero… pic.twitter.com/uGjC7esFwR

— Volodymyr Zelenskyy / Володимир Зеленський (@ZelenskyyUa) August 4, 2026