Një ngjarje e pazakontë është regjistruar në qytetin e Barit, në Itali, ku një biletë lotarie fituese me vlerë 1 milion euro u gjet mes mbeturinave, pasi ishte hedhur gabimisht nga pronarja e saj.

Sipas kompanisë së menaxhimit të mbetjeve SANB, bileta u gjet "ende e paprekur" brenda kamionit të mbeturinave, pas një operacioni të posaçëm kërkimi të zhvilluar nga punonjësit e shërbimit.

Ngjarja nisi të dielën, kur gruaja shkoi në një pikë shitjeje pranë banesës për të verifikuar biletën pas hedhjes së shortit. Pajisja e dyqanit e shfaqi biletën si të papagueshme, pasi pikat e vogla të shitjes nuk autorizohen të kryejnë pagesa për fitime të mëdha. Duke besuar se nuk kishte fituar, ajo e la biletën në dyqan dhe u largua.

Pak më vonë, një familjar i saj e njoftoi se kombinimi i numrave që kishte luajtur rezultonte fitues. Familja u kthye menjëherë në dyqan, por bileta ishte hedhur tashmë në kosh, ndërsa kamioni i mbeturinave ishte larguar.

Pas sinjalizimit, punonjësit arritën të lokalizonin kamionin dhe e transportuan atë në ambientet e një kompanie të specializuar, ku u zhvillua një kontroll i imtësishëm për shkak të kushteve të sigurisë. Pas një dite kërkimesh mes mbeturinave, u gjetën disa bileta lotarie, mes të cilave edhe bileta fituese me vlerë 1 milion euro.

Drejtori i SANB-së, Roberto Nicola Toscano, bëri të ditur se fituesja shpërtheu në lot sapo mori lajmin se bileta ishte gjetur. "Do ta kisha përqafuar, por po flisnim në telefon", u shpreh ai, duke përshkruar emocionet e gruas, e cila për pak sa nuk humbi një fitim prej 1 milion eurosh. ANSA