ITALI – Janë zbardhur detaje të reja nga vrasja e 24-vjeçarit shqiptar Nurian Dalipaj, i cili humbi jetën pasi u godit me thikë në fyt gjatë një konflikti në Vescovato, në provincën e Kremonës.

Sipas mediave italiane, autori i dyshuar është Mattia Miraglia, 32 vjeç, i cili është arrestuar dhe po hetohet për veprat penale të vrasjes dhe tentativës për vrasje.

Hetimet paraprake tregojnë se ngjarja nisi mbrëmjen e së dielës në një lokal në Kremona, ku Miraglia pa ish-partneren e tij duke biseduar me Dalipajn. Mes dy të rinjve shpërtheu fillimisht një debat verbal, i cili u pasua nga një përplasje e shkurtër jashtë lokalit. Më pas, 32-vjeçari u largua drejt banesës së tij në Vescovato.

Pak kohë më vonë, Nurian Dalipaj, së bashku me dy vëllezërit e tij, shkuan pranë banesës së autorit të dyshuar. Sipas hetimeve, Miraglia doli jashtë i armatosur me një thikë kuzhine dhe, pas një konflikti të ri, goditi 24-vjeçarin në fyt, duke i shkaktuar plagë fatale.

Gjatë përleshjes mbeti i plagosur rëndë edhe vëllai 20-vjeçar i viktimës, i cili ndodhet në terapi intensive, ndërsa vetë autori pësoi një dëmtim në dorë.

Sipas dëshmive të banorëve dhe personave që njihnin autorin e dyshuar, konflikti mes palëve kishte nisur prej kohësh dhe lidhej me motive xhelozie, të lidhura me ish-partneren e 32-vjeçarit.

Autoritetet italiane vijojnë hetimet për të sqaruar plotësisht dinamikën e ngjarjes, që ka tronditur komunitetin e vogël të Vescovatos.