PUKË – Ka ndërruar jetë në Spitalin e Traumës në Tiranë, Aleks Uka, i cili mbeti i plagosur rëndë në një aksident rrugor të ndodhur në segmentin Fushë Arrëz–Bajram Curri, në fshatin Porav.

Fillimisht u raportua se aksidenti kishte ndodhur pas një përplasjeje mes një motori dhe një automjeti fuoristradë, por verifikimet e kryera në vendngjarje kanë zbardhur një tjetër dinamikë të ngjarjes.

Sipas të dhënave paraprake, Aleks Uka ka humbur kontrollin e motorit me të cilin udhëtonte dhe është përplasur me murin anësor të rrugës. Automjeti fuoristradë nuk rezulton të ketë qenë i përfshirë në aksident, por është ndalur në vendngjarje për t’i dhënë ndihmë të dëmtuarit.

Pas aksidentit, Uka u transportua fillimisht në spitalin e Bajram Currit, ndërsa për shkak të gjendjes së rëndë shëndetësore u dërgua me helikopter drejt Spitalit të Traumës në Tiranë.

Pavarësisht përpjekjeve të mjekëve, ai ka humbur jetën si pasojë e plagëve të marra.

Policia vijon hetimet për të zbardhur plotësisht rrethanat dhe shkaqet e aksidentit.

Pukë / Informacion paraprak

Rreth orës 08:45, në aksin rrugor "Fushë Arrëz–Fierzë", dyshohet se janë përplasur automjeti me drejtues shtetasin K. H. dhe motomjeti me drejtues shtetasin A. U.

Si pasojë e aksidentit është dëmtuar drejtuesi i motomjetit, shtetasi A. U., 37 vjeç, i cili ka humbur jetën në spital.

Me drejtuesin e automjetit, shtetasin K. H., 59 vjeç, po kryhen veprimet procedurale.

Grupi hetimor po punon për zbardhjen e plotë të rrethanave të aksidentit.