CËRRIK — Policia e Shtetit ka goditur një rast të krimeve mjedisore në fshatin Gostimë të Cërrikut, ku gërryerja e paligjshme e shtratit të lumit Devoll kishte sjellë si pasojë devijimin e rrjedhës dhe rrezikimin e tokave bujqësore.

Në kuadër të operacionit, autoritetet vunë në pranga tre persona dhe shpallën në kërkim administratorin e subjektit. Të arrestuarit janë L. X., 35 vjeç, dhe shtetasi indian L. B., 42 vjeç (të dy punonjës të subjektit), si dhe B. T., 46 vjeç, i cili u arrestua pasi kishte ngritur një ndërtim pa leje në afërsi të zonës. Ndërkohë, administratori i subjektit, 22-vjeçari K. H., është shpallur në kërkim.

Nga hetimet e kryera rezultoi se subjekti ushtronte aktivitetin e gërryerjes së shtratit të lumit jashtë koordinatave të përcaktuara në lejen përkatëse. Si pasojë e kësaj veprimtarie të paligjshme, ishte devijuar rrjedha e ujit dhe ishin rrezikuar tokat bujqësore të zonës.

Në cilësinë e provës materiale, policia sekuestroi një ekskavator dhe një kamion teknologjik që përdoreshin për gërryerjet. Përveç masave penale nga ana e Policisë, subjekti është ndëshkuar edhe administrativisht nga Inspektorati Kombëtar i Mbrojtjes së Territorit (IKMT) Tiranë dhe IMT Cërrik, ndërsa materialet procedurale i kanë kaluar Prokurorisë pranë Gjykatës së Shkallës së Parë të Juridiksionit të Përgjithshëm Elbasan.