PRISHTINË — Kryeministri në detyrë, Albin Kurti, ka intensifikuar përpjekjet për arritjen e një marrëveshjeje politike për formimin e institucioneve të reja të Kosovës, në prag të seancës konstituive të Kuvendit të caktuar për 6 gusht.

Në kuadër të konsultimeve, Kurti kishte ftuar në takim krerët e partive parlamentare. Lidhja Demokratike e Kosovës ka pranuar ftesën dhe do të marrë pjesë në takimin e planifikuar për orën 18:00 në Kuvendin e Kosovës.

Në krahun tjetër, Partia Demokratike e Kosovës dhe Aleanca për Ardhmërinë e Kosovës kanë refuzuar ftesën, duke përsëritur qëndrimin e tyre për të vijuar veprimtarinë në opozitë. Kryetari i PDK-së, Bedri Hamza, ka deklaruar se pret që Vetëvendosje dhe partitë e tjera të gjejnë një zgjidhje për krijimin e institucioneve.

Kurti ka theksuar se data 6 gusht duhet t’i gjejë partitë të përgatitura për konstituimin e legjislaturës së re, ndërsa bisedimet e sotme me LDK-së mbeten vendimtare për arritjen e mundshme të një dakordimi paraprak.