PRISHTINË — Kryeministri në detyrë, Albin Kurti, dhe kryetari i Lidhjes Demokratike të Kosovës (LDK), Lumir Abdixhiku, do të zhvillojnë një takim këtë pasdite, në orën 18:00, për të diskutuar rreth zhbllokimit të situatës politike dhe krijimit të institucioneve.

Takimi vjen vetëm një ditë para seancës konstituive të Kuvendit të Kosovës, e cila është caktuar të mbahet të enjten, më 6 gusht, në orën 10:00.

Më herët, Kurti u kishte drejtuar ftesë krerëve të tri partive kryesore parlamentare: PDK-së, LDK-së dhe AAK-së. Ndërsa Partia Demokratike e Kosovës dhe Aleanca për Ardhmërinë e Kosovës refuzuan ftesën duke konfirmuar qëndrimin e tyre në opozitë, lideri i LDK-së, Lumir Abdixhiku, pranoi të marrë pjesë në tryezën e diskutimit.

Bisedimet e sotme konsiderohen vendimtare për të mësuar nëse palët do të arrijnë një dakordim politik për tejkalimin e ngërçit institucional përpara seancës së Kuvendit.