FIER — Nisja e muajit gusht është shoqëruar me fluks të lartë automjetesh dhe trafik të rënduar në aksin rrugor Fier–Kthesa e Patosit, ku radha e mjeteve ka arritur deri në 4 kilometra gjatësi.

Ngarkesa më e madhe e trafikut regjistrohet në drejtim të Patosit, Roskovecit dhe Mallakastrës. Kolona e automjeteve shtrihet nga hyrja e qytetit të Fierit deri pranë kthesës së Portëzës, duke shkaktuar vonesa të ndjeshme për drejtuesit e mjeteve.

Sfidat e qarkullimit në këtë segment përsëriten çdo vit gjatë sezonit veror për shkak të rritjes së lëvizjeve. Në terren ndodhen shërbimet e Policisë Rrugore për menaxhimin e trafikut dhe lehtësimin e lëvizjes, ndërsa autoritetet u bëjnë thirrje drejtuesve të mjeteve të tregojnë kujdes dhe të respektojnë udhëzimet e efektivëve.