SARANDË — Policia e Shtetit ka finalizuar operacionin e koduar "Silenciatori", duke arrestuar pesë persona në fshatin Gjashtë të Sarandës, të dyshuar se kishin udhëtuar për të kryer një vrasje me pagesë ose hakmarrje.

Operacioni u zhvillua pas sigurimit të informacioneve në rrugë operative nga Komisariati i Policisë Sarandë, në bashkëpunim me Forcën Kombëtare e Sigurisë (Njësia Fier).

Dy prej të dyshuarve, S. M., 32 vjeç, banues në Tiranë, dhe A. K., 26 vjeç, banues në Kavajë, u kapën në flagrancë pranë një lokali në fshatin Gjashtë. Ata ndodheshin në një zonë pa ndriçim dhe po nxirrnin armët e zjarrit nga automjeti për të zënë pritë.

Në kuadër të të njëjtit operacion u arrestuan edhe tre persona të tjerë për veprën penale "Moskallëzimi i krimit":

Alfred Kaja, 26 vjeç, banues në Kavajë

Vitrin Hoxha, 20 vjeç, banues në Kavajë

V. P., 31 vjeç, banues në Tiranë

Franko Bobja, 21 vjeç, banues në Kavajë

Në cilësinë e provës materiale, policia sekuestroi dy armë zjarri pistoleta, sasi municioni luftarak, një silenciator dhe dy automjete të përdorura nga grupi.

Nën drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Sarandë, hetimet vijojnë për zbardhjen e plotë të ngjarjes, identifikimin e shënjestrës së synuar dhe dokumentimin e plotë ligjor të veprimtarisë kriminale të të arrestuarve.