PUKË – Një aksident i rëndë rrugor është regjistruar në aksin Fushë Arrëz–Bajram Curri, në fshatin Porav, ku një drejtues motori ka mbetur i plagosur rëndë pas përplasjes me një automjet fuoristradë.

Sipas informacioneve paraprake, fuoristrada ka goditur motorin që drejtohej nga shtetasi A. Uka, duke i shkaktuar dëmtime të rënda.

I plagosuri është transportuar fillimisht drejt spitalit të Bajram Currit, por për shkak të gjendjes së rënduar shëndetësore është bërë i mundur transportimi i tij me helikopter drejt Spitalit të Traumës në Tiranë, për të marrë trajtim të specializuar.

Në vendngjarje kanë mbërritur forcat e Policisë, të cilat kanë nisur hetimet për të përcaktuar shkaqet dhe rrethanat e plota të aksidentit.