SHBA – Shtetet e Bashkuara të Amerikës kanë njoftuar zyrtarisht ratifikimin e marrëveshjes me Shqipërinë për një kredi prej 302 milionë dollarësh, në kuadër të programit Financimi i Huaj Ushtarak (Foreign Military Financing – FMF).

Sipas njoftimit të autoriteteve amerikane, fondet do të mbështesin përpjekjet e Shqipërisë për të përmbushur Angazhimin e Mbrojtjes së Hagës, i cili parashikon rritjen e shpenzimeve për mbrojtjen në nivelin 5% të Prodhimit të Brendshëm Bruto deri në vitin 2035.

Kredia do të përdoret për modernizimin e Forcave të Armatosura të Shqipërisë, përmes blerjes së pajisjeve dhe kapaciteteve ushtarake me origjinë nga Shtetet e Bashkuara, si dhe për rritjen e aftësive mbrojtëse në kuadër të sigurisë euroatlantike.

Në njoftim theksohet se marrëveshja pasqyron partneritetin e ngushtë strategjik mes SHBA-së dhe Shqipërisë. Si vend anëtar i NATO-s, Shqipëria është vlerësuar për bashkëpunimin me Uashingtonin në çështje të rëndësishme të sigurisë dhe politikës së jashtme.

Autoritetet amerikane vlerësojnë gjithashtu kontributin e Shqipërisë në strukturat ndërkombëtare të sigurisë, duke përmendur edhe pjesëmarrjen e saj si anëtare themeluese e Bordit të Paqes të Presidentit Donald Trump.

Marrëveshja prej 302 milionë dollarësh konsiderohet një hap i rëndësishëm drejt forcimit të kapaciteteve mbrojtëse të Shqipërisë dhe thellimit të bashkëpunimit strategjik mes Tiranës dhe Uashingtonit.