LEZHË, 3 gusht 2026 – Një aksident i rëndë me pasojë vdekjen e një personi është regjistruar mbrëmjen e kësaj të hëne në aksin rrugor Lezhë–Milot, pranë kryqëzimit të Shënkollit.

Sipas informacioneve paraprake, një automjet ka përplasur një këmbësor, një burrë rreth 50 vjeç, i cili ka humbur jetën në vendngjarje si pasojë e plagëve të marra.

Pas përplasjes me këmbësorin, automjeti ka dalë nga kontrolli dhe është përplasur me ambientet e një marketi pranë rrugës, duke shkaktuar dëme materiale.

Menjëherë në vendngjarje kanë mbërritur shërbimet e Policisë dhe grupi hetimor, të cilët kanë nisur veprimet për dokumentimin e ngjarjes dhe zbardhjen e plotë të rrethanave të aksidentit.

Deri më tani nuk janë bërë të ditura zyrtarisht identiteti i viktimës, si edhe shkaqet që çuan në aksident, ndërsa hetimet vijojnë.