Gjashtë aksidente rrugore janë regjistruar gjatë kësaj të hëne në zona të ndryshme të vendit, duke shkaktuar një viktimë dhe nëntë persona të plagosur.

Një nga ngjarjet më të rënda u shënua në aksin rrugor Fier–Lushnjë, pranë fshatit Vajkan, ku dy automjete u përplasën dhe përfunduan në kanalin anësor të autostradës. Përplasja e fortë la të plagosur katër persona, të cilët u transportuan me urgjencë drejt Spitalit Rajonal të Fierit.

Pak minuta më pas, një aksident zinxhir u regjistrua në autostradën Durrës–Tiranë, pak para Sukthit, në drejtim të Tiranës. Në përplasje u përfshinë shtatë automjete, por fatmirësisht pati vetëm dëme materiale. Ngjarja shkaktoi bllokim të qarkullimit dhe radhë të gjata automjetesh.

Një tjetër aksident ndodhi rreth orës 13:30 në hyrje të fshatit Stan-Karbunarë, në aksin e vjetër rrugor nacional Lushnjë–Berat. Një automjet me të cilin udhëtonte një 28-vjeçare është përplasur me barrierat anësore të një ure dhe, pas disa rrotullimeve, ka përfunduar i kthyer në njërën anë në mes të rrugës. Drejtuesja e mjetit u transportua me urgjencë në Spitalin e Lushnjës për ndihmë mjekësore.

Në lagjen Sheq i Madh në Fier, një tjetër aksident la të plagosur drejtuesin e një motomjeti, pas përplasjes me një automjet.

Në mbrëmje, një aksident fatal u regjistrua në Ksamil, ku humbi jetën 20-vjeçari Antonio Mateli. Sipas policisë, ngjarja ndodhi rreth orës 18:10 në rrugën e Plazhit, në zonën e Lagunës, ku një automjet tip “Benz”, me drejtues shtetasin A. Gj., rreth 22 vjeç, humbi kontrollin dhe doli nga rruga.

“Si pasojë e aksidentit, ka humbur jetën në vendngjarje pasagjeri i automjetit, shtetasi A. M., rreth 20 vjeç. Drejtuesi i automjetit është transportuar në spital për ndihmë mjekësore dhe, sipas informacionit paraprak, ndodhet jashtë rrezikut për jetën”, njoftoi policia.

Ndërkohë, pak pas orës 19:30, tre persona të tjerë mbetën të plagosur pas një aksidenti në aksin nacional Elbasan–Cërrik, ku një automjet dhe një furgon u përplasën me njëri-tjetrin.

Brenda vetëm 12 orësh, bilanci i aksidenteve rrugore në vend ishte një viktimë dhe nëntë të plagosur, duke rikthyer shqetësimin për sigurinë rrugore gjatë sezonit veror, kur fluksi i automjeteve rritet ndjeshëm.