KLOS – Është publikuar fotoja e minatorit Ilir Kolaveri, 40 vjeç, i cili humbi jetën tragjikisht pas një aksidenti në minierën e kromit në Tërnovë.

Kolaveri u rrëzua aksidentalisht në galeri dhe më pas u zu poshtë nga një masiv kromi. Pas kërkimeve dhe operacionit të shpëtimit, trupi i tij u nxor nga thellësia e minierës pasditen e së shtunës.

40-vjeçari ishte baba i tre fëmijëve të mitur, dy djemve dhe një vajze. Sot familjarët, miqtë dhe komuniteti do t’i japin lamtumirën e fundit.

Për ndarjen e tij nga jeta ka reaguar edhe Njësia Administrative Suç-Kurdari, në Bashkinë Klos, e cila e ka cilësuar Kolaverin si një njeri të dashur për familjen, miqtë dhe komunitetin.

“Dhimbje e madhe për familjen Kolaveri nga fshati Suç. Nga galeritë e minierës humbëm një baba, vëlla, kushëri dhe mik të mirë për të gjithë ata që e njohën Ilirin. Zoti i dhëntë durim familjes në këtë dhimbje të madhe”, thuhet në dedikimin e publikuar.

Ndërkohë, lidhur me aksidentin, Policia e Bulqizës ka arrestuar drejtuesin teknik të subjektit minerar, Përparim Koçi, 63 vjeç, pasi dyshohet se nuk ka zbatuar rregullat e mbrojtjes në punë, duke sjellë pasojë aksidentin fatal.

Materialet procedurale i janë referuar Prokurorisë për veprime të mëtejshme.