BALLSH – Një zjarr i përmasave të mëdha ka përfshirë pasditen e sotme fshatin Kash të Ballshit, duke shkaktuar dëme materiale dhe duke vënë në rrezik zonat e banuara.

Sipas informacioneve paraprake nga terreni, deri tani dy banesa janë shkrumbuar plotësisht nga flakët, ndërsa situata vijon të mbetet kritike për shkak të përhapjes së shpejtë të zjarrit.

Era e fortë dhe terreni i vështirë kanë favorizuar avancimin e flakëve, të cilat kërcënojnë edhe banesa të tjera pranë zonës së përfshirë nga zjarri.

Forcat zjarrfikëse janë angazhuar në terren dhe po punojnë për izolimin e vatrës aktive, mbrojtjen e banorëve dhe parandalimin e përhapjes së mëtejshme të flakëve.

Autoritetet vijojnë monitorimin e situatës, ndërsa priten të dhëna të reja mbi përmasat e dëmeve dhe ndërhyrjen e strukturave të emergjencës.