KRASNODAR, RUSI – Katër persona, mes tyre një fëmijë, kanë humbur jetën pasi rrënojat e një droni ukrainas ranë mbi një plazh të mbushur me pushues në rajonin e Krasnodarit, sipas autoriteteve ruse.

Sipas mediave ndërkombëtare, incidenti ndodhi pranë qytetit Gelendzhik. Guvernatori i rajonit, Veniamin Kondratiev, deklaroi se viktimat u shkaktuan nga rënia e mbetjeve të dronit dhe jo nga një goditje e drejtpërdrejtë.

Nga ngjarja mbetën të plagosur edhe 10 civilë, përfshirë dy të mitur. Tre prej tyre u transportuan në spital për trajtim mjekësor, ndërsa të tjerët morën ndihmën e parë në vendngjarje.

Me urdhër të guvernatorit rajonal, në zonë u angazhua një ekip i specializuar mjekësor për reagimin ndaj situatës së emergjencës. Autoritetet lokale kanë njoftuar se do të ofrojnë mbështetje për të plagosurit dhe familjet e viktimave.

Më herët gjatë ditës, guvernatori Kondratiev deklaroi se sulmi kishte në shënjestër infrastrukturën civile në rajon. Ndërkohë, shërbimet e emergjencës vijojnë punën në vendngjarje për pastrimin e rrënojave dhe dokumentimin e plotë të incidentit.

Pretendimet e autoriteteve ruse mbi rrethanat e sulmit nuk janë konfirmuar në mënyrë të pavarur.

A Ukrainian kamikaze drone hit a beach in Gelendzhik, Russia; killing 4 people and injuring 13 others. pic.twitter.com/EER8zd3ldd

— Clash Report (@clashreport) August 3, 2026