LUSHNJË – Një aksident rrugor është regjistruar në hyrje të fshatit Stan-Karbunarë, në aksin e vjetër nacional Lushnjë-Berat, ku një 28-vjeçare ka mbetur e plagosur.

Sipas informacioneve paraprake, automjeti me të cilin udhëtonte e reja është përplasur me barrierat anësore të një ure dhe, pas disa rrotullimeve, ka përfunduar i përmbysur në njërën anë të rrugës.

Si pasojë e aksidentit, drejtuesja e mjetit është transportuar me urgjencë drejt spitalit të Lushnjës, ku po merr ndihmën e nevojshme mjekësore.

Në vendngjarje kanë mbërritur shërbimet e Policisë Rrugore, të cilat kanë kryer veprimet e para hetimore, kanë dokumentuar situatën dhe kanë menaxhuar qarkullimin e automjeteve.

Nga të dhënat paraprake dyshohet se shkak i aksidentit ka qenë humbja e kontrollit mbi drejtimin e automjetit. Grupi hetimor vijon punën për të përcaktuar shkaqet dhe rrethanat e plota të ngjarjes.